Storia del Popolo Veneto

L'identità veneta la gà le só raixe in èpoche on mucio antighe, prima anca de le concuiste romane: la siviltà dei Veneti Antighi (o Venetkens), che la xe durà pì de 1.000 ani.
I veneti antighi i gheva svilupà na só lengua - el venetego - e i xe pasài ala storia par èsare tra i pì grandi xlevadori de cavali del tenpo e grandi comercianti de anbra.
El popolo veneto el xe on dei pochi dela penixola 'taliana a vantar on continuum dai albori dela Storia, se no anca dela Preistoria. Se ga notisia dei primi Veneti insediài inte'l nord-est dela penixola, ma so na area on mucio pì vasta de quela de uncó, fin da IX secolo a.C. se vardemo i ritrovamenti archeolòjisi, le situle - vaxi funerari in bronxo - i reperti veneteghi catài anca in Slovenia, Istria, inte l'Austria atuale – Carinsia, fin a Adria.
Le teorie sora le só orìjini le xe contrastanti, ma se scumisia a asetare l'idea (vedi Palotino, Devoto e altri studioxi) che i vegnese dal mar Bàltego, o comuncue dal centro de l'Europa, e che i sie rivài inte la penixola comerciando l'anbra de chele xone.
Secondo na nova interpretasion e tradusion, el studioxo xloveno Matej Bor el metarìa la lengua dei antighi veneti rento l'area protoslava, teoria che par vero no la xe acetà dai studioxi italiani, che i mete la formasion del venetego in Italia, considerandolo somejante al latin (anca se a l'epoca del venetego el latin el jera 'ncora in formasión).
El prinsipale nucleo urban dei antichi veneti el jera sens'altro Este, 'ndove che ancó ghe xe on intaresante muxeo co tanti e tanti reperti de l'època. Altro gran sentro de la siviltà paleoveneta el xe stà Padova, fondà drio la tradisión inte l'ano 1183 a.C., ben prima de tanti altri insediamenti storegamente inportanti come la sità de Roma, fondà inte'l 753 a.C..
Intorno el II secolo a.C. xe scumisià la cusidìta faxe dela "romanixasion": i veneti no i xe mai stài concuistài dai romani ma i xe deventài aleài, asetando de èsare parte integrante del mondo roman.
Dato che i xera aleài e no dei vinti, come che jera costume lori i podeva mantegnere le só tradisión, leji e costumanse anca se tra el secondo e el terso secolo dopo Cristo se ga perdesto l'uxo dela lengua venetega. El latin che se ga scumisià a parlare el ga mantegnesto però la cadensa e serte caraterìsteghe de la lengua dei veneti antìghi: ghe ne ghemo prova parché a Tito Livio, stòrego padovan, se ghe rinproverava l'uxo de on latin che no xera puro.

Sóto l'inperador Augusto le tere venete le xe deventàe la "Decima Regio - Venetia et Histria", parte integrante de l'Inpero Roman, che el riconoseva cuindi a 'sta zona na conotasión culturale unitaria.

La caduta de l'inpero roman la ga metésto la semensa de la nàsita de Venesia, che la ga portà 'vanti l'eredità dei pari antighi, inte la leje (vedi el "dirito veneto", che el jera peculiare e difarente dal "dirito roman", dato che xera difarenti le fonti e le orijini) e inte le tradisión, dando vita insieme a na nova civiltà veneta, amirà e rispetà in tuto el mondo.
I Veneti profughi da l'entrotera i ga fondà la capitale in laguna. Venesia, la "sità dei Veneti", par on breve periodo inisiale la ga subìo l'infroensa bixantina, anche se co tuta l'autonomia che ghe derivava dai só nasenti comerci e dala só nasente flota, destinà on dì a dominare par tuto el Mediteraneo.

La Serenisima Republica Veneta la ga costituìo on modelo de Stato parlamentare e federale unico al mondo, a cui se ga ispirà tra i altri anca i pari fondadori dei Stati Unìi dela 'Merica. Cuela Veneta la xe stà la pì longeva Republica al mondo, durà pì de 1.100 ani.

I popoli anési ala Republica i lo ga fato de só spontanea volontà. El termine de "Dominante" che spetava ala capitale el xe sens'altro dexviante, se ciapà col significato moderno, parché in realtà tra i popoli governài (asàe difarenti tra de lori) e Venesia ghe xe stà soratuto on vincolo de afeto filiale, inte'l só sentimento, e paterno, inte'l sentimento de chi che li governava.
Col tenpo la Republica la ga méso le propie baxe so le sponde de l'Istria e de la Dalmasia e la se ga rivolto dopo a l'entrotera, consapevole de riocupare teritori che i jera veneti xà da mileni. Trevixo, par exenpio, la xe stà la primogenita del futuro "Stato de tera" e la se ga "dedicà" ala Republica Veneta – che vol dir che la ga dimandà e otegnesto de èsare anésa - inte'l disenbre del 1338.
Venesia la ga ciapà 'sto nome solo inte'l III secolo e la xe nasùa come sentro intorno al V secolo co el nome de "Rivo Alto" (Rialto), formando sucesivamente na federasion co altre sità venete dela costa adriatega, da Grado a Cioxa. 'Sta union politega inte'l 697 la xe deventà on Stato unitario co l'elesion popolare - fato davero unico e raro inte on mondo onde che inperava re, sovrani e despoti - de on unico capo, el Doxe (duca).
El Doxe el jera donca l'espresión de l'arengo, o consejo dei capifameja, tradisión, cuela de l'asenblea, che la se tramandava dai tenpi dei Veneti antighi.


La Serenisima, co da “Dogado” (sircoscrito ala laguna) la xe diventà on vero e propio Stato, la se ga struturà cofà Stato federale.
Ogni sità anésa, che la fuse veneta o no, la xera considerà e ciamà “nasion” (la nasion bergamasca, la nasion bresana evc.).
El splendore dela Republica el ze stà costruìo so le enormi richese derivanti dal comercio, favorìo al masimo in maniera che el fuse la prinsipale fonte de entrate del Stato, che el mantegneva ben lejera la presion fiscale so i suditi. Jera promoso e proteto el xvilupo de ogni forma de Arte e Corporasion, osia le categorie economeghe, e al vèrxarse dela bela stajon se formava do enormi colone navali, una direta verso l'Axia, 'st'altra verso l'Oceano Atlantego.
El proverbiale atacamento dei sitadini (ma al tenpo i se ciamavano suditi, come i inglexi 'ncora al dì de uncó) al Stato Veneto el xe stà la vera forsa de la nasion; davanti al bixogno dela patria tute le comunità, i popoli e le clasi sociali i se mobilitava: greghi, albanexi, slavi che i viveva rento i só confini i jera considerài “nasionali” a tuti i efeti, e cusì ciamài rento i documenti; ognun gheva dirito de parlar la só lengua, de governarse co le proprie leji, de tegner le propie costumanse. Valori e concuiste che i xe stà tante volte scancelà dai Stati cusitadìti moderni, che i se ga spartìo i teritori veneti co xe cascà la Serenisima.
Par cuatro secoli longhi la Serenisima la ga costituìo na diga posente contro la travolxente ondà otomana che, forte de imense armade, la anbìva al controlo del Mediteraneo. Ma Venesia la ga fermà. Tuti ga sentìo parlare de Lepanto (7 de otobre del 1571) la cui vitoria la xe dovùa in gran parte a l'aporto veneto e ala vitorioxa stratejìa de Sebastian Venier, Capitan da Mar dela Republica Veneta.

A la fine del Trexento l'Istria e la Dalmasia le xe deventàe posedimenti stabili. Intanto se gheva verto na serie de guere in teraferma che le ga visto la Serenisima prevalere so le signorie locali, xbarajando i Cararexi de Padova, i Scalijeri de Verona, el Patriarca filo-inperiale de Acuileia e parfin i potenti Visconti de Milan. El valor sol canpo no el xe mai stà tegnùo separà da na scrupoloxa asion diplomatega e da na calcolà e prudente condusion politega da parte de organi de governo che al mondo de alora, i apariva el fruto de na parfeta ingegneria istitusionale.

Inte'l Quatrosento Venesia la ga ormai formà el só Stato, che el conprende on Stato da Tera e on Stato da Mar estendendo i confini a est e a ovest entro i limiti de l'antìga Decima Regio. El Stato de Tera el ndava da l'Ada a ovest a l'Istria a est; el Stato da Mar el rivava invese a ocupare tuta la costa dalmata pì calche ixola dela Grecia. Cuesto el xe forse el periodo pì splendido e florido pa la Serenisima: imense richese le se acumula a Venesia, e ghe ne benefisia tuto el Stato parché ogni sità la pole esportare in tuto el Mediteraneo e l'Europa del Nord i só prodoti lavorài e semilavorài.
El governo veneto el xe gran amà da tuti i só consitadini e se forma ormai on sentimento nasionale veneto (ma dovarisimo dire che el se riforma) el cui sinbolo xe el Leon marciàn (de San Marco), adotà xà inte'l Trexento so le bandiere.

Soi primi àni del Sincuesento la Republica la ga riscià de sparire, streta come che la jera da potense ostili rento la penixola italiana (che le temeva la só espansion continua) e in Europa. Intiere nasion coordinàe dal Papà le se ga aleà contro Venesia, formando la Lega de Cambrai: la xe stà la prova pì teribile pa la Serenisima, ma i governanti veneti i ga avùo modo de capire de aver fondà on vero Stato, coexo e unìo ala capitale, pur co le grandi autonomie garantìe. Tuto el popolo dela teraferma el ga partesipà ala lota contro l'invaxor.
El Macchiavelli, che el se catava a Vicensa come oservadore, tra l'exercito de Masimilian de Asburgo che el masacrava "i rexistenti" che i se oponeva co roncole e forconi ai só soldài, vedendo contadini e popolani preferire la morte pitosto che rinegare San Marco (“mi son marchesco e marchesco vojo morir” ga sigà orgojoxo on poro vilan prima de 'ndar so la forca) el ga scrito che Venesia la podeva vìvare trancuila e sicura, avendo suditi cusì fedeli. La crixi po' la se ga risolto, sia grasie ai mutamenti de schieramento tra i aversari, sia grasie al lavoro diplomatego dela Republica. I teritori invadesti, praticamente l'intiero Stato veneto da Tera, i xe stài liberài.

Col Siesento però l'atività mercantile la ga scumisià a segnare el paso, par l'invadensa dei turchi che i ostacolava i trafeghi co l'Oriente e par l'avertura de nove rote par le 'Meriche. Seben minore rispeto ai secoli d'oro, l'atività maritima la se ga mantegnesto comuncue lucroxa e la flota militare anca inte'l '700 la xe restà tra le pì potenti d'Europa. El patrisiato venesian el ga dimostrà na incredibile versatilità come inprenditore in teraferma: xe stà incrementà el xvilupo agricolo in canpagna e el manifaturiero inte la Pedemontana.
Xe tacà cusì l'època dele Vile Venete.
El Veneto el xe deventà una de le aree pì produtive d'Europa.


Quando che inte'l 1797 Napoleon Bonaparte el xe ndà rento inte'l nord de la penixola italiana a l'inseguimento dele trupe austriache che se ritirava, Venesia la se ga mantegnesto neutrale. Parò, capìa la debolesa del rico, florido, ma militarmente debole ospite, el ga pensà ben de inpadronirse dele richése dei Veneti acumulàe inte'l corso dei secoli e de fare del Stato venesian na merce de scanbio co i Austriasi. El se ga inventà cuindi de sana pianta on "casus belli" par inpore la fine del lejitimo governo veneto e istituire on Stato buratin, premesa dela fine dela milenaria Republica Serenisima anca come Stato, no solo come istitusión.
NInte'l marso de chel ano el Major Consejo par aver salva la vita dela popolasion el ga asetà le dure condision de Napoleon, ignorando che xà in aprile a Leoben, in Stiria, la Fransa la gheva concordà in gran segreto co l'Austria la cesion dei teritori veneti.
Sóto le presión 'ramai insostegnibili de l'"Atila" Napoleon (cusì el se ga autodefinìo el generale Corso inte i confronti dela Republica Veneta) e par òpara de jacobini e colaborasionisti fransexi che i insitava la popolasión a rivoltarse contro la Republica Veneta (sensa rixultati, parché le munisipalità che ga ciapà el potere inte le sità de l'entrotera le ga podesto farlo solo grasie ale baionete fransexi e ala asensa de rexistensa dele armade venete), el Major Consejo el ga abdicà i só poteri co la famoxa votasion del 12 de majo del 1797, "el dì tremendo", par far posto a on governo filo-fransexe, ciamà "Munisipalità provixoria". 'Sta nova forma de governo la xe durà pochi méxi, durante i cuali par ordine de Bonaparte xe stàe abatùe le statue co el Leon alà de San Marco, storego sinbolo del Stato veneto, e i xe rivài parfin a fuxilare cueli che i sigava "Viva San Marco!".
Oviamente el teritorio el ga subìo on sachejo teribile e i veneti i xe stài costreti a véndare parfin le vesti che i gheva indoso o le fibie de arxento dele scarpe par far fronte a na tasasion bestiale da parte de i fransexi.
La fine dela Republica glorioxa la ghe pareva inposibile a tuti. El popolo in particolar modo prima el ga inpugnà le armi contro i invaxori (famoxo resta l'exenpio dele "Pasque Veronesi") e po' el ga manifestà in ogni forma el so dolore: celebre xe l'epixodio de Perasto, sitadina so le boche de Cataro, uncó inte'l Montenegro, che fin dai tenpi antìghi la custodiva la bandiera de l'amiraja dela flota da guera venesiana. Par secoli jera restà in vigore l'uxansa secondo cui dodexe gonfalonieri perastini i jera dexignài a diféndarla, fin al prèso dela vita, come che xe capità a Lepanto, sol ponte dela nave.
Quando che inte l'agosto del 1797 el baron Rukovina el ga volesto ciapare posèso dela sitadina a nome del'inperadore d'Austria, i perastini i ga dimandà i onori soleni ala bandiera veneta, e i la ga sepolìa soto l'altare dela Ciexa, dopo 'verla baxà tuti e bagnà de lagreme. Jera el 27 de agosto del 1797 cuando che el "Capitan dele Guardie" Giusepe Viscovich el ga sepelìo soto l'altar majore del Domo la bandiera veneta, pronunsiando on discorso de gran amor patrio*.

Co el Congrèso de Viena inte'l 1815 la Republica Veneta la xe stà l'unico Stato de dimension grande - travolto da venti ani de guere - a no èsare restaurà parché l'Austria la se ghe n'ha apropià. La perdita de l'indipendensa la ga segnà par i Veneti el scumisio de na disexa teribile, fata de stenti, fame e mixeria, condision che le se ga strasinà fin ai ani '50 del Novesento, costrenxendo metà dela popolasion a emigrare in tuto el mondo.

Inte'l 1866, finìa la goera persa co l'Austria, el Regno d'Italia el xe riusìo istéso a farse consegnar, grasie a la só aleansa co la Prusia, le tere venete e furlane.
El 1866 par i Veneti el xe stà on ano de profondi e radicali canbiamenti soto tuti i punti de vista: sociale, politego e economego. A Lissa la marina austro-veneta la ga conbatùo e vinso par mare contro la marina italiana/piemontexe. Jera el 20 de lujo e la Bataja de Lissa la xe pasà ala storia cofà l'ultima gran vitoria dela flota veneta (la major parte dei marinari defati la vegneva dale tere che jera dela Republica Veneta): i ordini i vegneva dati in lengua veneta e al sigo "....daghe doso, Nino, che la ciapemo" l'amirajio Tegetthoff el ga ordinà a Vincenso Vianelo da Pelestrina sol finire dela bataja el speronamento dela corasà "Re d'Italia", che la xe afondà da là a pochi istanti. De fronte a chela vitoria i ecuipaji veneti i ga risposto tirando par aria le barete e sigando "Viva San Marco!!". Sto qua al xera 'ncora el spìrito dele xenti Venete.
Al termine del conflito, i austriasi i ga volesto onorare i caduti nostri co on bel monumento, propio a Lissa, faxéndoghe scrìvare de sora i nomi dei marineri venesiani e dalmati morti in bataja e anca 'sto mòto: "Omani de fero (i marineri veneti, ndr) so nave de legno, i ga batù òmani de legno so nave de fero". Quando che l'Italia fasista la ga ocupà la Dalmasia, chel monumento el xe stà portà via da la Marina italiana e el xe 'ncora conservà a l'academia militare de Livorno.
I veneti i se jera xà scontrài pochi méxi prima, vinsendo, contro l'exercito italian: jera el 24 de jugno del 1866 defati cuando che le trupe piemontexi, guidàe dal re Vitorio Emanuele II e da Alfonso Lamarmora, le ga dovesto socónbare a Custoza contro cuele austriache, 'ndove che conbateva anca tanti veneti.
No bastando 'ste do sconfite, le trupe italiane da là a poco le ga invadesto le tere venete, aprofitando del fato che i austriasi i se jera ritirài dai nostri teritori dopo che i Prusiani i gheva vinto a Sadowa e i jera drio par minaciare Viena. Da là a poco se ga organixà in tuta presa par el stéso ano on plebisito par domandare ai veneti se i jera favorevoli a entrare a far parte de l'Italia (a chel tenpo Regno).
El plebisito (che Montanelli no el exitava a definire "na burleta") el se ga tegnesto el 21 e 22 de otobre del 1866. Pochi sa che el 19 de otobre, donca on paro de dì prima dele votasion, rento na stansa de l'hotel Europa sol Canal Grando el generale Leboeuf (plenipotensiario fransexe e "garante" del xvolximento dela consultasion) el ga firmà la cesion del Veneto a l'Italia. Prima 'ncora del plebisito le tere venete le jera xà stàe cedùe ufisialmente ai italiani, el tuto in sordina e sensa clamore; solo "la Gaxeta de Venesia" el dì dopo la ghe ne gheva dato notisia, in pochisime righe: "Questa mattina in una camera dell'albergo d'Europa si è fatta la cessione del Veneto".
Inte i ani 'pena dopo l'anesion a l'Italia ze rivà na ondà de povartà mai vista in Veneto: nove tase - come la tristemente famoxa "tassa sul macinato" - e la leva obligatoria, che la ga privà le fameje venete de l'aiùto dei xóvani, stroncando l'economia contadina veneta. 'Pena dopo l'unità d'Italia xe scumisià on dei pì grandi exodi inte'l mondo: l'epopea de l'emigrasion veneta. I veneti i xe stài costreti a xbandonare la só tera e le só caxe, in serca de na nova vita, dale foreste del Braxile ale miniere del Belgio, jera el scumisio de na emigrasion dale dimension bibliche: tra el 1876 e el 1901, so na popolasion de sirca tre milioni de persone, ga dovesto emigrare 1.904.719 Veneti.

Pì 'vanti, le do guere mondiali le ga trasformà la tera veneta inte on canpo de bataja, co la distrusion de intiere sità. Dopo la seconda guera mondiale, la nova costitusion republicana la ga sancìo l'alontanamento del re d'Italia e, inte'l 1970, se ga formà la Rejon del Veneto come forma de autogoverno, ridota parò a dimension minime, privà del Friuli, dela Venesia Julia, e dele xenti venete del Trentin che sarìa stà lojico incorporare rento na macrorejon par motivi storisi, de cultura uniforme e de lengua (trane che par el Friuli).

Grasie ala só proverbiale dedision al laoro e al senso de sagrifisio che da senpre li caraterixa, i Veneti i ga podesto rimétare in pie da chel momento la só economia, tanto da crear on vero e propio modelo industriale e de xvilupo: naseva cusì el "fenomeno Nordest", da tanti ciamà anca "la locomotiva d'Italia".
Ma la prima fonte economega par el Veneto la xe sensa dubio el turismo: la xe la prima rejon italiana par flusi turìstisi.
Fra i altri primati, i veneti i xe i primi o ai primisimi posti par solidarietà, par donasion organi e sangue, par risiclo dele scoàse, par acojensa verso i foresti.
L'agricoltura in parte la ga perdùo l'abondansa del pasà, ma la pole senpre contare so la fertilità dela pianura veneta.

El Veneto de uncó el se prexenta, insoma, come na tera che la nutre promese de rinasita, confidando inte la só enorme enerjia creativa, so i só talenti e la só laborioxità, so la valorizasion senpre pì forte dela só cultura e so l'autodeterminasion del só popolo.

---

*Discorso di Perasto

Discorso pronunsià a Perasto – al dì de uncó inportante sità del Stato del Montenegro - dal "Capitan dele Guardie" Giusepe Viscovich el 27 de agosto del 1797, cuando che el ga dovesto sepolire, insieme a l'intiera popolasion in lagreme, el Gonfalon de San Marco, meténdolo momentaneamente soto l'altar majore del Domo in atexa del ritorno de l'amà Republica:

"In sto amaro momento, in sto ultimo sfogo de amor,
de fede al Veneto Serenisimo Dominio, al Gonfalon de la Serenisima Republica,
ne sia el conforto, o citadini, che la nostra condota pasada,
e de sti ultimi tenpi, rende non solo più giusto sto ato fatal,
ma virtuoxo, ma doveroxo par nu.
Savarà da nu i nostri fioi, e la storia de el zorno
farà saver a tuta l'Europa, che Perasto la gà degnamente sostenudo fin a l'ultimo
l'onor de el Veneto Gonfalon, onorandolo co sto ato solene,
e deponendolo bagnà de 'l nostro universal amaro pianto.
Sfoghemose, citadini, sfoghemose pur, e co sti nostri ultimi sentimenti
sigilemo la nostra cariera corsa soto al Serenisimo Veneto Governo,
rivolgemose a sta Insegna che lo rapresenta, e su de ela sfoghemo el nostro dolor.
Par trexentosetantasete ani le nostre sostanse, el nostro sangue,
le nostre vite le xè sempre stàe par Ti, S.Marco;
e fedelisimi senpre se gavemo reputà, Ti co nu, nu co Ti,
e senpre co Ti sul mar semo stài lustri e virtuoxi.
Nisun co ti ne gà visto scanpar, nisun co Ti ne gà visto vinti e spauroxi!
E se i tenpi presenti, tanto infelisi par inprevidensa, par disension,
par arbitrii ilegali, par vizi ofendenti la natura e el gius de le xenti,
non Te gavese cavà via, par Ti in perpetuo sarave stàe le nostre sostanse,
el nostro sangue, la vita nostra.
E piutosto che védarTe vinto e desonorà da i tói, el coragio nostro,
la nostra fede se averave sepelìo soto de Ti.
Ma xa che altro no ne resta da far par Ti,
el nostro cor sia l'onoradisima tó tonba,
e el più duro e el più grando elogio le nostre làgreme."

---

VIDEO: la Storia de la Serenisima

Prexentemo drio man un video, divixo in do parte, so la Storia dela Republica Veneta, dale orijini al tramonto del Stato Veneto. El video el xe tirà fora da un convegno organixà a marso del 2010 da l'Asociasión culturale Veneto Nostro - Raixe Venete - relator: Avv. Lorenzo Fogliata.

PARTE 1 [durata: 40' 08"]

PARTE 2 [durata: 29' 14"]

---

ALTRE FONTI DI INFORMAZIONE SULLA STORIA VENETA:

• Storia del Veneto (in lingua veneta) su Wikipedia
• Storia Veneta su MagicoVeneto.it
• Storia Veneta su Cronologia.it
• Storia della Repubblica Veneta su Wikipedia
• Storia di Venezia su Wikipedia
• I Dogi della Repubblica Veneta su Wikipedia
• "La vera storia del 1866" su Cronologia.it
• Opuscoli e libri in PDF di Storia Veneta su RaixeVenete.net
• Interessante sezione dedicata alla Storia Veneta su VenetoNostro.it
• "Storia di Venezia, materiali per la ricerca" su StoriaDiVenezia.it
• La Repubblica di San Marco di Daniele Manin (1848) su Wikipedia
• Il Leone di san Marco, simbolo per eccellenza del popolo veneto su Wikipedia
• Elenco cronologico dei principali fatti riguardanti la città di Venezia e il suo Stato
• Storia dei Paleoveneti o Veneti Antichi su Wikipedia
• Il Venetico o Veneto Antico su Wikipedia