Normative rejonali
e internasionali

Riconosimento rejonale
dela lengua Veneta

La Rejon Veneto dal 1999 la ga ciapà la strada che la ga portà al riconosimento dela lengua e de l’identità veneta co l’aprovasion, da parte del Consejo Rejonale, de na risolusion (n. 262) che la dimanda al Stato italian de riconosare el veneto come lengua.

Un paso concreto el xe raprexentà dala leje rejonale 14 genaro 2003, n. 3 (publicà sol BUR n. 5/2003) che la prevede so l’art. 22 (Inisiative de promosion e valorixasion de l’identità veneta) che:

“La junta rejonale la promove e la favorise inisiative de riserca, de divulgasion e de valorixasion del patrimonio culturale e lenguistego indove che l’identità veneta la se fonda co l’organixasion de convegni, seminari, mostre, riserche, publicasion e eventi finalixài a far conosare la conplesità culturale e lenguistega 'ndove che se pole riconosare l’espresion e i segni de l’identità veneta”.


Altro momento inportante el xe raprexentà dala leje rejonale 13 aprile 2007, n. 8 (BUR n. 37/2007) che la se ocupa dela TUTELA, VALORIXASION E PROMOSION DEL PATRIMONIO LENGUISTEGO E CULTURALE VENETO.

Inte la só stexura se sotolinea l’inportansa del provedimento la xe dà dala prexensa de na risolusion del Consejo d’Europa del 16 marso 1988, che la aferma che “el dirito dele popolasion a esprìmarse inte le só lengue rejonali o minoritarie inte l’anbito dela só vita privata e sociale costituise un dirito inprescritibile”.

Da là l’intervento dela Rejon, tramite l’òpara del Consejo Rejonale, che el sotolinea che “i Stati pì avansài e rispetoxi dei diriti dele minoranse i ga capìo che cuando un popolo el xe cosiente dela propia identità, el xe pì disponibile ala conprension dele culture dei altri”.

La leje rejonale la prexenta dei aspeti de baxe dela lengua veneta

L’articolo 2, defati, el definise cosa che bixogna inténdare par lengua veneta indicando “le spesifeghe parlade storegamente doparàe inte'l teritorio veneto e so i posti indove che le xe stàe mantegnùe da comunità che le ga conservà in modo rilevante la istésa matrìse”.

So l’articolo 5 vien po' istituìa na Festa del Popolo Veneto: “al fine de favorire la conosensa dela storia del Veneto, de valorixarghine l'orijinale patrimonio lenguistego, de ilustrarghine i valori de cultura, de costume, de civìxmo, inte la só consistensa e la só prospetiva, oltre che de far conosare adeguatamente el Statuto e i sinboli dela Rejon” che la “vien el 25 marso, dì dela fondasion de Venesia”.

St'altri articoli i disiplina le asion che la junta rejonale la pole realixare “al fine de favorire la conosensa e la difuxion del patrimonio lenguistego veneto”.

---

NOTA: anca se xe stà riconosùo dala Rejon del Veneto, al momento el Stato italian no'l ga gnancora riconosùo el veneto cofà lengua.
Le lengue riconosùe da l'Italia - oltre oviamente a l'italian - le xe: furlan, ladin, todesco, xloveno, ositan, fransexe, franco-provensale, albanexe, grego, sardo, catalan e croato.

---

» Va' a la sesión: el Riconosimento internasionale

» Altro materiale de intarèse: